سوپاس گوزاری بەشێکە لە بەختەوەری

چۆپی مەجید/ ڕاهێنەری دەروونی

٣٠/١٢/٢٠١٢

ئێمەی مرۆڤ زۆربەی جار بێ ئاگاین لەو بەخشیشانەی کە خوای گەورە پێی بەخشیوین، کە ئەمەش وا دەکات زیاتر ڕەشبین بین بەرامبەر ژیان. یەکێك لەو هەڵانەی کە زۆربەمان ئەیکەین سەیرکردنی کەسانی دەوروبەرمانەو بەراوردکردنیانە بەخۆمان. ئەگەر هاتوو ئەو کەسانەی کە بەراوردیان ئەکەیت لەگەڵ خۆت لەتۆ باشتر بوون، ئەوە ناگەیەنێت کە تۆ کەسێکی باش نیت. یان وابزانیت ئەگەر ئەوان باری ئابووریان باشتر بوو لە تۆ ئیتر ئەوان باشتر و دڵخۆشتر و بەختەوەرتر ئەژین. بەداخەوە کە من ڕۆژانە بەرگوێم ئەکەوێت کە خەڵکی نمونەی لە خۆیان بەرزتر ئەهێننەوە بۆ ئەوەی بۆخۆیان بسەلمێنن و خۆیان دڵنیا بکەنەوە کە ئەوان ئەو ژیانەیان مەیسەر نەکردووە کە خەونی پێوە ئەبینن، هەست ئەکەن کە نا دادپەروەریەك بونی هەیە. باشی و خراپی لە بەراووردکردندا هەمیشە ئەگەڕێتەوە بۆ ئەوەی کە مرۆڤ لەگەڵ کێ خۆی بەراورد ئەکات.

بە باشم زانی و بە خۆشحاڵیەوە هەندێ وتەی دکتۆر لاش- ئێریك ئونستۆڵ کە لە نامەیەکیدا بۆ ئەندامانی ڕاهێنانە دەروونیەکانی ناردبوو وەری گێڕم بۆ کوردی، کە ئەڵێ:

- ئەگەر لە سەلاجەکەتدا خواردن هەبوو، جل لە کەنتۆرەکەتدا هەبوو، لە ژێر سەقفێکدا بوویت و سیسەمێکت هەبوو کە لەسەری بنویت. ئەوا تۆ لە %٧٥ ی دانیشتوانی جیهان دەوڵەمەندتری.

- ئەگەر پارەت هەبوو لە بانکدا و هەندێکیش لە گیرفانتا ئەوا تۆ یەکێکی لەو لە %٨ دەوڵەمەندانەی جیهان.

- ئەگەر بەیانیان لەخەو هەستایت بەتەندروستیەکی باش و ئازارت نەبوو، ئەوا تۆ باشتری لەو ملیۆن کەسانەی کە نەخۆشی سەختیان هەیە یان ئەمرن.

- ئەگەر تۆ هەرگیز لە شەڕ و بەندینخانەو ئەشکەنجەدا نەژیابی ئەوا پێویستە تۆ سوپاس گوزاربیت و نرخی ئەو ژیانە بزانیت کە نزیکەی پێنچ سەد میلیۆن کەس نیەتی لە جیهاندا.

- ئەگەر تۆ سەربەرز و دەم بەخەندە و گەشبین و سوپاس گوزاری ئەوا ئەبێ پیرۆزبایت لێبکرێ، لەبەر ئەوەی زۆرن ئەوانەی کە هۆکاری تەواویشیان هەیە بۆ ئەوەی سوپاس گوزار و بەو شێوەیە بن، بەڵام نایکەن.

ئێمە پێویستمان بەوە هەیە کە ڕۆژانە چەند جارێ خۆمان بە ئاگا بهێنینەوە هەتا ئەو ئەو شتانەی کە هەمانە باشتر بیینین و سوپاس گوزاربین. لەوانەیە ئێمە زۆربەمان لایەنی فیزیکیمان بەهێزبێت و ( دەست، قاچ، چاو ، گوێ ) مان هەیەو لەش ساغین، ماوەتەوە سەر ئەوەی کە دەروونمان بەهێز بکەین و دەبێ سوپاس گوزاربین و کاریان پێبکەین هەتا دەگەینە ئاستی ئەو خۆشگوزاریەی کە ئێمە ئەمانەوێت. خۆشگوزاری بەو شێوەیەی کە تۆ وەك تاك هەستی پێدەکەیت کە لەوانەیە زۆر جیاوازبێت لەگەڵ خۆشگوزاری کەسانیتر، بەڵام بۆ تۆ مانایەکی گەورەی هەیەو ژیان و وزەت پێ ئەبەخشێ.

بەختەوەری ناخ دۆزینەوەی زۆر ئاسان نیە، ئەگەر خۆتت ڕانەهێنابێت بۆ ئەوەی لایەنە باشەکانی خۆت ببینی پێش لایەنە لاوازەکانت، ئەگەر ئەو شتەی دڵخۆشت ئەکات هەستی پێ نەکەیت و نەبوبێتە بەشێك لە بیرکردنەوەکانت، ئەگەر بەردەوام نەبیت لە هاوکاریکردنی کەسانی دەوروبەرت و بڵاوکردنەوەی گەشبینی، ئەگەر ئەو وزەیە هەست پێ نەکەیت کەوەری دەگریت کاتێك وزە لە پێناو کارێکی باشدا سەرف دەکەیت.                                                                                                                                                                                                           بۆ ئەوەی لەم بوارەدا بەئاگاتر بیت پێویستت بە بارێکی ئارام و خاوبوونەوە هەیە، بۆ ئەم مەبەستەش تەکنیکەکانی ڕاهێنانە دەروونیەکان بەکاربێنە بۆ ئەوەی باشتر دەستت بگاتە ناو سەرچاوە شاراوەکانی خۆت هەتا ببێتە هۆکارێك بۆ بەختەوەریت.

www.warzshidaruni.com

دەروون بەهێزو ئاسودەبن

گەڕانەوە